Boy George laus úr fangelsi
Boy George Reuters
Breski tónlistarmaðurinn Boy George hefur verið látinn laus úr fangelsi, ellefu mánuðum fyrr en til stóð. Hann var dæmdur í fimmtán mánaða fangelsi í janúar fyrir að hafa haldið norskum fylgdarpilti föngnum heima hjá sér á árinu 2007.
Samkvæmt fréttum breskra fjölmiðla var Boy George látinn laus vegna góðrar hegðunar en hann þarf að ganga með staðsetningartæki um ökklann næstu mánuði og mæta á fundi hjá skilorðsfulltrúa sínum reglulega.
Boy George, sem er 47 ára og fyrrum söngvari Culture Club, var sakaður um að hafa handjárnað 29 ára gamlan Norðmann, Audun Carlsen, og barið hann með járnkeðju þegar hann reyndi að flýja íbúð popparans í kjölfar nektarmyndartöku.
George, sem heitir réttu nafni George O'Dowd, játaði að hafa handjárnað Carlsen í apríl árið 2007. Hann sagði hins vegar að hann hefði gripið til þessa ráðs eftir að grunsemdir vöknuðu hjá honum að Norðmaðurinn hafi átt við tölvuna hans og náð þaðan ljósmyndum.
Carlsen segir þetta vera tilbúning. Hann hafi verið færður í handjárn vegna þess að George hafi viljað refsa honum fyrir að vilja ekki stunda með honum kynmök.
