Pútín kíkti í keppnishöllina
Jóhanna Guðrúm í Moskvu
Eftir Ingveldi Geirsdóttur ingveldur@mbl.is
„Helgin er búin að vera vinna, vinna og vinna,“ segir Jónatan Garðarsson fararstjóri íslenska Evróvisjónhópsins þegar blaðamaður slær á þráðinn til hans í Moskvu í gær.
„Í gærkvöldi [laugardag] fórum við í partý sem gríski flytjandinn hélt í Euroklúbbnum. Þar fluttu margir keppendur lagið sitt og m.a. Jóhanna sem var næstsíðust á svið, á undan Grikkjanum,“ segir Jónatan og bætir við að flutningur Jóhönnu hafi lukkast mjög vel. „Þau sungu eftir undirspili af diski á meðan hinir voru með svokallað „Sing On“ og hermdu eftir sjálfum sér. Ég hef fengið mjög góð viðbrögð við því að Jóhanna hafi sungið í alvörunni.“
Mikið havarí átti sér stað í keppnishöllinni á laugardaginn þegar sjálfur Pútín, forsætisráðherra Rússlands, leit þar inn. „Maður fann að það var eitthvað einkennilegt í gangi og svo kom hann. Það var mjög erfitt að sjá hann og hvað þá mynda, Pútín er ekki mjög hávaxinn og það voru örugglega um 20-30 tröllvaxnir öryggisverðir í kringum hann sem hrintu fólki frá. Evróvisjón er stórt mál hér og ríkisstjórnin setur mikinn pening í keppnina.“
Opnunarveisla í gærkvöldi
Í gær var Jónatan með öðru sjónvarpsfólki við vinnu í keppnishöllinni en um kvöldið var opnunarhátíð Evróvisjónkeppninnar og var Jónatan að búa sig undir hana um leið og hann spjallaði við blaðamann.„Jóhanna var í viðtölum í dag og síðan var söngæfing kl. 16 en nú eru allir að gera sig klára fyrir opnunarveisluna sem borgarstjórn Moskvu og ríkisstjórn Rússlands halda í Euroklúbbnum í kvöld.
Á morgun [í dag ] byrjar dagurinn á fundum hjá okkur sjónvarpsfólkinu og svo þurfum við að vera komin í höllina um hádegi en fyrsta búningarennsli er kl. 14. Síðan er annað eins rennsli um kvöldið þegar dómnefndir horfa á.
Á eftir fer Jóhanna í Euroklúbbinn og syngur „The Winner Takes It All“ með Abba. Í ár eru 35 ár síðan Abba vann keppnina og það er hálfgerð afmælisveisla í klúbbnum annað kvöld þar sem Jóhönnu var boðið að syngja Abba-lag.“
Að sögn Jónatans er Jóhanna að fá góða athygli og samkvæmt óformlegri könnun sem á sér stað í höllinni er henni spáð öðru sæti upp úr sínum riðli. Bosníu-Hersegóvínu er spáð sigri.
