Ástralska poppsöngkonan Kylie Minogue missir ekki svefn yfir þeirri staðreynd að hún nýtur ekki sömu vinsælda í Bandaríkjunum og hún gerir í Evrópu og Ástralíu. Hins vegar lætur hún sig oft dreyma um að vera fræg Hollywood-leikkona. Minogue sem hóf ferilinn fyrir 20 árum í áströlsku sápuóperunni Grönnum (Neighbours) viðurkennir að hún hafi ekki alltaf tekið réttar ákvarðanir á ferlinum og að sumar ákvarðanirnar hafi orðið til þess að kvikmyndaferillinn er ekki eins vel á veg kominn og hana hefði langað. Í viðtali við Reuters-fréttastofuna segir hún að hana dreymi um að hitta leikstjóra sem ráði hana í hlutverk á svipaðan hátt og Nick Cave fékk Minogue til að syngja með sér í laginu Where The Wild Roses Grow árið 1996 sem var sannarlega af öðrum toga en það sem Kylie hafði áður gert, tónlistarlega. „Cave sá mig í allt öðru ljósi, trúði á mig og treysti því að ég gæti uppfyllt óskir hans um lagið. Og það heppnaði stórkostlega,“ segir Minogue sem heldur í tónleikaferðalag um Bandaríkin síðar á þessu ári.