Glanspían Paris Hilton segir að erfiðasta lífsreynsla sín hafi verið þegar hundurinn hennar hvarf. Þessi ummæli stúlkunnar hafa vakið töluverða athygli í ljósi þess að hún hefur lent í einu og öðru um ævina, en árið 2003 lak kynlífsmyndband með henni og fyrrverandi unnusta hennar, Rick Salomon, á netið. Þá eyddi hún 23 dögum í fangelsi árið 2007 eftir að hafa verið fundin sek um að keyra án þess að hafa til þess tilskilin réttindi. Hún segir þetta þó ekki hafa verið neitt miðað við það þegar chihuahua-hundurinn hennar, sem nefnist Tinkerbell, hvarf.

„Það var svo hræðilegt. Hún var týnd í heila viku og ég vissi ekki hvort hún kæmi aftur eða ekki. Þetta var eins og að missa barnið sitt. Hún var samt bara rétt hjá allan tímann, heima hjá gamalli konu. Konan horfði hins vegar ekkert á sjónvarpið þannig að hún vissi ekki að hundurinn minn var horfinn. En svo sá hún auglýsingu þannig að ég fékk Tinkerbell aftur,“ segir Hilton.