Peter Gabriel fær Polarverðlaunin
Peter Gabriel. mbl.is
Tilkynnt var í morgun, að tónlistarmennirnir Peter Gabriel og José Antonio Abreu hljóti sænsku Polarverðlaunin í ár. Um er að ræða tónlistarverðlaun, sem Stikkan Andersson stofnaði til árið 1989 og eru verðlaunin jafnan veitt annars vegar fyrir rokktónlist og hins vegar klassíska tónlist.
Peter Gabriel, sem er 59 ára, sló í gegn á áttunda áratug síðustu aldar með hljómsveitinni Genesis. Hann hætti síðan í hljómsveitinni og hóf sólóferil.
José Antonio Abreu er sjötugur að aldri frá Venesúela. Hann er menntaður píanóleikari og tónskáld en fær verðlaunin fyrir svonefnt El Sistema verkefni, sem Abreu hleypti af stokkunum 1975 og miðar að því að gera fátækum börnum kleift að afla sér tónlistarmenntunar.
Karl Gústaf Svíakonungur mun afhenda Polarverðlaunin í Stokkhólmi í sumar.
