Jóhanna Guðrún Jónsdóttir. Reuters

Veðbankar spá Íslandi 7. sæti í úrslitum Evróvisjón söngvakeppninnar í Moskvu á morgun. Líklegast er talið, að Noregur fari með sigur af hólmi, Grikkland verði í 2. sæti og að Tyrkland og England berjist um 3. sætið.

Æfingar standa nú yfir í Moskvu fyrir keppnina á morgun. Á opinberum vef keppninnar segir, að bakgrunnurinn á sviðinu, þegar íslenska lagið sé flutt, sé einn sá tilkomumesti í keppninni en þar sigla skip fyrir fullum seglum og höfrungar stökkva. Sviðsmyndin sé blá sem hæfi laginu fullkomlega.

Breska tónskáldið Andrew Lloyd Webber, sem samdi enska lagið í keppninni, mætti í höllina á fyrstu búningaæfinguna í dag, en hann hefur ekki látið sjá sig fram að þessu.

Á blaðamannafundi eftir æfinguna viðurkenndi hann að hann væri að heyra flest lögin í fyrsta sinn. Hann nefndi samt að tveir vina sinna, Ronan Keating og Chris Neil ættu lög í keppninni.