Anna Frank. Reuters

Gyðingastúlkan Anna Frank, sem lét lífið í útrýmingarbúðum nasista, hefði orðið áttræð á síðasta föstudag hefði hún lifað. Í tilefni af því hefur æskuvinkona hennar Eva Schloss minnst hennar í viðtölum við fjölmiðla. Þetta kemur fram á fréttavef CNN.

Schloss segir Önnu hafa verið mikinn daðrara, sem hafi sífellt verið að skipta um hárgreiðslu og koma sér í vandræði með sögum sínum.

 „Hún fékk dagbókina sína árið 1942, þannig að pabbi hennar hefur vitað hversu mikinn áhuga hún hafði á að skrifa. Ég vissi líka að hún bjó til sögur. Hún talaði mikið og var kölluð ungfrú Quack Quack. Hún þurfti oft að skrifa hundrað sinnum „Ég ætla ekki að tala svona mikið" en hún hafði augljóslega margt að segja," segir Schloss.

„Ég var feimin en hún var alltaf miðpunktur athyglinnar. Það voru tröppur sem við sátum oft á og þá safnaðist hópur barna í kring um hana. Hún daðraði mikið. Hún elskaði stráka. Hún var alltaf að sýna okkur hver væri kærastinn hennar í það og það skiptið. Hún hafði líka mikinn áhuga á fötum."

Dagbók Önnu Frank, sem skrifuð var er Anna og fjölskylda hennar voru í felum í Amsterdam, er ein mest lesna bók heims. Þau voru síðan handtekin og flutt í útrýmingarbúðir þar sem öll fjölskyldan lét lífið nema faðir Önnu. Hann gaf síðan út dagbók hennar að henni látinni.