Jackson á dansæfingu Reuters

Poppkóngurinn virtist í miklu fjöri og vel stemmdur síðustu vikur og jafnvel klukkustundir fyrir andlátið, en hann hafði æft af kappi fyrir komandi tónleikaröð í London sem átti að hefjast 13. júlí. Vinir og samstarfsmenn segja hann endurnærst af því að hafa svo mikið fyrir stafni.

Eftir mörg erfið ár m.a. undir ásökunum um kynferðisofbeldi gegn barni virtist Michael Jackson hafa náð sér á strik á ný. Hann hafði ráðið einkaþjálfara og æfði dans í nokkra tíma á dag. „Hann lagði hart að sér og gaf þar með fordæmi, hafði umsjón með dansinum og knúði æfingarnar áfram,“ er haft eftir umsjónarmanni æfingahúsnæðisins.