Finnsk kona, sem er læknir að mennt, hefur verið búsett á Tegel-flugvellinum í Berlín í sjö mánuði. Konan á við geðræn vandamál að stríða og hefur fleygt vegabréfi sínu og krítarkortum.

Presti í finnska söfnuðinum í Berlín tókst fyrr í vetur að koma konunni inn á geðdeild á meðan beðið væri eftir því að hún yrði flutt til Finnlands. Finnskt hjúkrunarfólk hélt til Berlínar til að sækja konuna en dómari hafði áður leyft að hún yrði útskrifuð þar sem læknar sögðu að hún ógnaði hvorki sjálfri sér né öðrum. Presturinn, sem heimsækir konuna og gefur henni fé, hefur farið þess á leit við yfirvöld í Finnlandi og Þýskalandi að fundin verði lausn á málum hennar. Finnsk yfirvöld vilja að konan verði send heim eins og Tyrkir gerðu þegar hún bjó á flugvelli í Istanbúl um skeið. Málið snýst um hvaða þjóðríki ber að fjalla um málið. Konan hefur nú tvo hagsmunagæslumenn, finnskan og þýskan, en talar við hvorugan.