De Niro fórnarlamb listaverkasvindls

Allnokkur verk eftir Robert De Niro eldri, föður leikarans og nafna, voru seld án hans leyfis eða aðkomu. Listaverkasali í New York hefur verið kærður fyrir að stela fimm milljónum dala frá ýmsum listaverkaeigendum. Hann var upphaflega handtekinn í mars fyrir að koma á fót umfangsmiklu svindli, sem metið var á 88 milljónir dala og gabbaði meðal annars tennisleikarann John McEnroe og Bank of America.

Lawrence Salander seldi í galleríi sínu, ásamt fleiri listaverkasölum, verk eftir abstrakt expressjónistamálarann De Niro, fransk-ameríska myndhöggvarann Gaston Lachaise og bandaríska myndhöggvarann Elie Nadelman. Þetta kemur fram á fréttavef Reuters.

Megnið af andvirði sölunnar rann beint í vasa  Salanders. Talið er að meira en ein milljón hafi átt að renna til De Niro vegna viðskiptanna.

Robert De Niro yngri hefur skipulagt sýningar á verkum föður síns um heim allan og á einnig mörg verka hans heima hjá sér.

Hægt er að sjá nokkur verka De Niro eldri á sýningunni frá Unuhúsi til áttunda strætis sem nú stendur yfir á Kjarvalsstöðum.

• 1 blogg um fréttina

Bloggað um fréttina

• Ingimundur Kjarval: Louisa Matthíasdóttir var líka í þessu Galleríi.