Indverska lögregla handtók í morgun mann sem hafði verið nítján ár á flótta en hann var árið 1990 sakfelldur fyrir að vanvirða indverksa þjóðfánann. Braut maðurinn ströng indversk fánalög um að koma fram við fánann af „göfuglyndi, hollustu og virðingu“ með því að vefja kjötstykki í hann.

Flóttamaðurinn, Ismail Mohammed, játaði á sínum tíma að hafa vanvirt fánann með fyrrnefndum hætti í kjötbúð sinni. Var hann í kjölfarið dæmdur í þriggja mánaða fangelsi í Kerala-héraði fyrir vanvirðuna en slapp úr haldi að sögn Tomin Thachankary, lögregluforingja.

Mohammed bar fyrir sig að hann vissi ekki hve ströng indversk fánalög eru en þau banna að fáninn snerti jörð eða vatn og sé notaður sem áklæði, umbúðir eða borðdúkur.