Baldur Þórhallsson, stjórnmálafræðingur, fer fyrir sögugöngu annað kvöld þar sem sögufrægir staðir sem tengjast lífi lesbía og homma í miðborg Reykjavíkur verða skoðaðir. Hefst gangan á Ingólfstorgi kl. 20:00.
Fjallað verður um menningu og líf einstakra samkynhneigðra Reykvíkinga allt frá lokum 19. aldar. Næturlífi, pólitík, bókmenntum og tónlist sem tengjast samkynhneigðum í borginni verða gerð skil og rifjaðir upp sögufrægir atburðir í lífi þeirra, að því er segir í tilkynningu.
Menning lesbía og homma í Reykjavík hefur til skamms tíma verið flestum hulin, en fjölda markverðra staða er að finna í miðborginni sem tengjast lífi þeirra. Markmið gönguferðanna er að svipta hulunni af þessum merkilega menningarkima borgarinnar.
Fyrirmyndin af göngunni er sótt til stórborga erlendis þar sem víða er boðið upp á slíka leiðsögn. Þetta er þriðja árið sem boðið er upp á sögugöngu á Hinsegin dögum og hafa göngurnar verið vel sóttar, samkvæmt tilkynningu.