„Ég er búin að vera í tónlist heillengi, ég byrjaði að spila á bassa þegar ég var þrettán ára og stofnaði Mammút fjórtán ára, tónlist hefur átt hug minn allan.

Þegar ég fór fyrst í hljóðver með Mammút fannst mér þetta svo heillandi tækni og fann að þetta væri fyrir mig,“ segir Guðrún Heiður Ísaksdóttir sem er eina stelpan í tólf manna bekk í námi í hljóðtækni sem Tækniskólinn býður upp á í samstarfi við Stúdíó Sýrland.

Auk þess að nema hljóðtækni spilar Guðrún á bassa með pönkhljómsveitinni Viðurstyggð og hyggst hún taka upp plötu með hljómsveit sinni bráðlega. „Svo höfum við Lovísa (Lay Low) vinkona mín verið að tala um að taka upp plötu með nýju efni frá henni með ljóðum eftir íslenskar konur. Ég hafði hugsað mér að hafa það sem lokaverkefnið mitt úr náminu.“ | 39