Agndofa og þakklátur

„Það er kraftaverk að sjá þetta gerast og veitir manni mikinn innblástur,“ sagði Vladimir Ashkenazy, heiðursstjórnandi Sinfóníuhljómsveitar Íslands, í gær þegar hann skoðaði sig um í tónlistar- og ráðstefnuhúsinu, sem er óðum að taka á sig mynd við hafnarbakkann í Reykjavík.

Ashkenazy hefur sem kunnugt er barist fyrir byggingu tónlistarhússins um áratugaskeið og stjórnaði m.a. frægum tónleikum Lundúnafílharmóníunnar á níunda áratugnum að viðstöddum Karli Bretaprinsi og Díönu prinsessu, en þeir voru haldnir til styrktar uppbyggingu tónlistarhúss Íslendinga. Þetta er í þriðja sinn sem Ashkenazy skoðar byggingarsvæðið og hann segir aðaltónleikasalinn lofa góðu: „Ég held að hljómburðurinn verði mjög góður enda stýra færustu hljómburðarsérfræðingar heimsins þeirri vinnu.“

Sjálfur segist hann vonast til að fá að stjórna fyrstu tónleikum Sinfóníuhljómsveitar Íslands í húsinu og að í framhaldinu verði hægt að bjóða þekktustu hljómsveitum heims til landsins að spila. „Ef þjóð hefur efni á því er mikilvægt að hafa bestu mögulegu aðstæður fyrir þau listaverk sem mannkynið hefur getið af sér í gegnum aldirnar. Við erum hluti af evrópskri siðmenningu og ef við getum verið í fremstu röð þá eigum við að vera það. Vilji fólksins í þessu landi er mjög sterkur og ég er agndofa og þakklátur fyrir að það eigi að klára þessa byggingu, þrátt fyrir þau hrikalegu vandamál sem þjóðin glímir við í dag. Ég átti ekki alveg von á því, en ég er mjög glaður yfir því að húsið verði að veruleika.“

ben@mbl.is