„Við erum báðir miklir hryllingsmyndaáhugamenn og höfum verið lengi,“ segir Guðmundur Jón Viggósson en hann og félagi hans, Trausti Elvar Jónsson, standa að baki heimasíðunni horror.is þar sem fjallað er um hinar ýmsu hryllingsmyndir og þeim gefnar einkunnir. „Ég man eftir að hafa byrjað að horfa á hryllingsmyndir um tíu ára gamall, bak við sófa hér og þar,“ segir Guðmundur.

Guðmundur segist ekki vita af sambærilegri íslenskri vefsíðu, þ.e. síðu sem fjalli sérstaklega um hryllingsmyndir. Því hafi hann keypt lénið horror.is og ætlar hann jafnvel að kaupa hryllingur.is.