„Sala bóka á íslensku það sem af er árinu hjá Eymundsson er jafnmikil og allt árið í fyrra. Áherslurnar í lestri og því sem fólk virðist vera að gera eru auk þess gjörbreyttar. Þetta eru svo jákvæð tíðindi að ég varð hálfsnortin. Þjóðin situr ekki með hendur í skauti, heldur ræktar hún og framleiðir sjálf,“ segir Bryndís Loftsdóttir, bóksali hjá Eymundsson.

„Það hefur orðið 600% aukning í seldum eintökum hannyrðabóka miðað við sama tíma í fyrra. Fjöldi seldra eintaka af bókum um garða, gróður og ræktun er 200% meiri nú,“ greinir Bryndís frá.

Veltan á matreiðslubókum á íslensku er nú í fyrsta skipti í 10 ár hærri en veltan á sjálfshjálparbókum, að sögn Bryndísar. „Matreiðslubækur hafa að vísu alltaf selst vel en það sem af er árinu er rúmlega 100% aukning í seldum eintökum miðað við sama tíma í fyrra. Útgáfa matreiðslubóka er mjög öflug núna. Það eru komnar að minnsta kosti 13 nýjar íslenskar matreiðslubækur á árinu og jólabókaflóðið er ekki byrjað.“

Sala á sjálfshjálparbókum hefur hins vegar minnkað talsvert, að því er Bryndís greinir frá.