Leikur sér að dúkkum

Barbra Streisand leikur sér enn að dúkkum. Hin 67 ára gamla söngkona ólst upp í mikilli fátækt og bætir sér það upp núna með því að kaupa eitt og eitt leikfang.

Streisand segir að þegar hún var krakki hafi vatnsflöskur verið dúkkurnar hennar. „Þegar maður á ekki hluti þarf maður að nota ímyndunaraflið,“ sagði Streisand og bætti við að fátæktin í æsku hefði enn áhrif á hana. „Ég trúi því ekki enn að ég hafi efni á því að fara í kostnaðarsöm frí, vegna þess að ef maður elst upp í fátækt er maður alltaf með það í huga. Það er alltaf hluti af manni sem er enn þessi litla stelpa sem fékk aldrei dúkkur þótt allir hinir krakkarnir ættu eina,“ sagði Streisand í spjallþætti Oprah Winfrey.

Streisand hefur unnið með leikfangaframleiðandanum Mattel við að skapa dúkku sem er eftirlíking af henni sjálfri. Hún sá lokaeintakið af dúkkunni í spjallþættinum og var ekki alveg ánægð með útkomuna.