Yoko Ono blæs til tónleika

Nk. föstudag verður kveikt á friðarsúlunni í Viðey og í tilefni af tendruninni mun ekkja Lennon og hugmyndasmiðurinn á bak við súluna, Yoko Ono, bjóða ókeypis ferðir til Viðeyjar 9.-11. október auk þess sem hún býður á tónleika til heiðurs Lennon í Listasafni Reykjavíkur - Hafnarhúsi á föstudaginn kl. 22.

Kveikt verður á ljósinu kl. 20 á föstudaginn, sem er fæðingardagur Lennons, og mun Hamrahlíðarkórinn syngja í Naustinu við Friðarsúluna. Eftir tendrun eru gestir hvattir til að koma við í Naustinu og skrifa á óskatré Yoko Ono. Samtímis verður dagskrá í Listasafninu þar sem tendrunin verður m.a. sýnd beint á tjaldi.  Að því loknu verður Bed In, heimildarmynd Yoko Ono um friðarbaráttu hennar og John Lennon, sýnd. Því næst verða sýndar stiklur úr Imagine Peace Tower, væntanlegri heimildarmynd Ara Alexanders Ergis um tilurð Friðarsúlunnar. Kl. 22 hefjast svo tónleikarnir og þar munu m.a. koma fram Jón Ólafsson, Eyþór Ingi, Egill Ólafsson, Björgvin Halldórsson, Helgi Björnsson, Páll Rósinkranz og KK. Kynnir verður Ólafur Páll Gunnarsson.

Yoko Ono hefur boðið Rauða krossi Íslands að standa fyrir fjársöfnun samhliða þessum viðburðum og leggur sömuleiðis til söfnunarinnar með beinum hætti. Söfnunarfénu verður varið i þágu fjölskyldna sem hafa orðið fyrir áföllum vegna efnahagsþrenginga undanfarinna mánaða.

Slökkt verður á friðarsúlunni 8. desember, á dánardægri Lennons.

• 2 blogg um fréttina

Bloggað um fréttina

• Kristinn Snævar Jónsson: Enginn veit
• Anna Guðný : Nú veit ég hvað