Kleifarvatn eftir Arnald Indriðason hlaut The Barry Award á glæpasagnaþinginu Bouchercon í Indianapolis í Bandaríkjunum í gær. Það var einn helsti aðdáandi Arnaldar í Bandaríkjunum, Ali Karim, frá tímaritinu Deadly Pleasures sem tók á móti viðurkenningunni fyrir hönd höfundar, að því er segir í tilkynningu.

The Barry Award eru veitt af tímaritunum Deadly Pleasures og Mystery News fyrir bestu glæpasöguna. Verðlaunin, sem hafa verið veitt árlega frá 1997, hafa hlotið höfundar á borð við Laura Lippmann, George Pelecanos, Lee Child og Michael Connelly. Kleifarvatn var einnig tilnefnt til Macavity verðlaunanna sem tímaritið Mystery Reader’s International stendur fyrir.

Í fréttatilkynningu kemur fram að bækur Arnaldar hafa selst í ríflega fimm milljónum eintaka heima og erlendis og setið ofarlega á metsölulistum í Danmörku, Noregi, Svíþjóð, Hollandi, Belgíu, Þýskalandi, Spáni og Frakklandi auk Íslands.

Nýjasta bók Arnaldar Indriðasonar, Svörtuloft, kemur út 1. nóvember nk.