Jon Bon Jovi kom fram með hljómsveit sinni í morgunþætti NBC í New York í morgun. AP

Aðdáandi bandaríska hafnarboltaliðsins Boston Red Sox hefur áfrýjað máli sem hann höfðaði á hendur Bon Jovi, Time Warner og bandarísku hafnaboltadeildinni (MLB). Málinu var vísað frá í fyrra, en maðurinn fór fram á 400 milljarða dala í bætur vegna höfundarréttarbrots.

Samuel Bartley Steele höfðaði málið í fyrra. Hann heldur því fram að lagið „I Love This Town“, sem hljómsveitin Bon Jovi gaf út árið 2007, sé alveg eins og lag sem hann samdi um Red Sox.

Steele segir hins vegar að sitt lag, sem heitir „(Man I Really) Love This Team“, hafi verið gefið út árið 2004. Þetta kemur fram á fréttavef breska ríkisútvarpsins.

Dómari vísaði málinu frá eftir að tónlistarfræðingur, sem kom fram á vegum Steele, komst að þeirri niðurstöðu að lögin væru ekkert sérstaklega lík.

Steele heldur því fram að hann hafi gefið leikmönnum Red Sox upptökur af laginu, sem og yfirmönnum í stjórn félagsins. Hann hafi einnig sent upptökur af laginu til stjórnar hafnaboltadeildarinnar. Þeir hefðu mátt nota lagið til að auglýsa íþróttina. Þá segir Steele að hann og félagar sínir í hljómsveitinni Bart Steele Band hafi komið fram og leikið lagið í sjónvarpi.

Bon Jovi gaf út lagið árið 2007 þegar úrslitakeppnin í bandaríska hafnaboltanum stóð sem hæst. Forsvarsmenn deildarinnar ákváðu síðan að nota lagið til að auglýsa keppnina á TBS-kapalstöðinni, sem er í eigu Time Warner.

Steele segir að Jon Bon Jovi hafi annað hvort heyrt lagið þegar hann tók þátt í kosningabaráttu forsetaframbjóðandans John Kerry í Boston árið 2004, eða þegar yfirmenn í stjórn félagsins létu hann hafa eintak af laginu.

Dómarinn komst hins vegar að þeirri niðurstöðu að engin skynsamur kviðdómur gæti komist að þeirri niðurstöðu að lögin væru lík. Þrátt fyrir þessa niðurstöðu hefur Steele áfrýjað málinu.