Johnny Depp hefur heitið Nicolas Cage því að  hann muni bjarga honum frá gjaldþroti. Depp mun hafa blöskrað þegar hann heyrði að Cage gæti hugsanlega orðið gjaldþrota í kjölfar þess að hann var rukkaður um ógreidda skatta sem nema um 6 milljónum Bandaríkjadala. Cage hyggst fara í mál við fjármálaráðgjafa sinn með þeim rökum að sá síðarnefndi hafi ekki staðið sig í stykkinu.

Hjartaknúsarinn Johnny Depp mun vera Cage ævarandi þakklátur fyrir að hjálpað sér á framabrautinni þegar Depp var að stíga fyrstu skref sín í Hollywood.
 
„Johnny hringdi í Nicolas og sagði honum að hann skyldi ekki hafa neinar áhyggjur,“ því hann myndi greiða úr málum fyrir hann," er haft eftir vini leikaranna í breska dagblaðinu Daily Express.

„Johnny þakkar Nicolas frægð sína og langar til þess að endurgjalda það með einhverjum hætti - þ.e. ef Nicolas fellst á það og vill taka við þeirri aðstoð. Johnny hefur aldrei gleymt hvað Nic gerði fyrir hann,“ segir vinurinn.

Þegar Cage og Depp kynntust fyrir rúmum tveimur áratugum var Depp fátækur tónlistarmaður sem var að bisast við að lifa af tónlistinni. Cage kom Depp í samband við umboðsmann sinn sem tókst að landa hlutverki fyrir Depp í myndinni A Nightmare On Elm Street sem frumsýnd var 1984. Þar með tókst ferill Depps á flug.