Ben Southall glaður yfir draumastarfinu. Reuters

Englendingurinn Ben Southall fékk „besta starf í heimi" á árinu: Að hafa í hálft ár umsjón með  hitabeltiseyjunni Hamilton, sem er skammt frá ströndum Queensland í Ástralíu. Nú segir hann að þetta starf hafi næstum kostað sig lífið.

Í starfinu, sem tugir þúsunda manna sóttu um, fólst að dvelja á Hamiltoneyju við kóralrifið mikla við að kafa og sigla við eyjuna og blogga um reynslu sína og koma svæðinu á framfæri við umheiminn. Fyrir þetta fékk hann rúmar 15 milljónir króna í laun.

Í síðustu viku, þar sem Southall svamlaði í heitum sjónum, fann hann skyndilega fyrir sting í öðrum handleggnum. Skömmu síðar fann hann fyrir dofa í útlimunum og leitaði þá læknis. Í ljós kom, að eitruð marglytta hafði stungið hann.  

Southall, sem er 34 ára, slapp með skrekkinn vegna þess hve fljótt hann komst undir læknishendur og fékk rétta meðhöndlun. Hann fékk hins vegar hita, höfuðverk, andþrengsli og háan blóðþrýsting í kjölfarið.