Tekjur af sýningu bandarísku stórmyndarinnar fóru um helgina yfir 1 milljarða dala en myndin hefur nú verið sýnd í þrjár vikur. Er myndin nú þegar orðin fjórða tekjuhæsta mynd sögunnar, samkvæmt gögnum sem birt voru í dag.

Margir sáu myndina, sem James Cameron hefur unnið að árum saman, nú um áramótin og nema tekjur af henni nú 1,02 milljörðum dala. Þær myndir, sem aflað hafa meiri tekna, eru Titanic, sem  Cameron gerði einnig en tekjur af henni námu 1,8 milljörðum dala, síðasta mynd Hringadróttinssögu: Hilmir snýr aftur, sem aflaði 1,12 milljarða dala tekna og sjóræningjamyndin Pirates of the Caribbean: Dead Man's Chest, sem aflaði 1,07 milljarða dala tekna.

Alls greiddu norður-amerískir bíógestir 68,3 milljónir dala fyrir að sjá Avatar um helgina og er þetta met þegar um er að ræða mynd sem búið er að sýna í þrjár vikur.  Gamla metið setti Köngulóarmaðurinn árið 2002, 45 milljónir dala.

Avatar, tölvuunnin framtíðarþrívíddarmynd, var sú langtekjuhæsta í Norður-Ameríku um helgina og aflaði 68,3 milljóna dala tekna. 

Myndin Sherlock Holmes, með Robert Downey Jr. í aðalhlutverkinu, var í 2. sæti með 38,4 milljóna dala tekjur en myndin var frumsýnd fyrir 10 dögum. Teiknimyndin Alvin and the Chipmunks: The Squeakquel, var í 3. sæti.

Í næstu sætum voru myndirnar It's Complicated, með Meryl Streep, Alec Baldwin og Steve Martin í aðalhlutverkum, The Blind Side, með Söndru Bullock,  Up in the Air, Prinsessan og froskurinn,  Did You Hear About the Morgans? Nine og Invictus.