Metaðsókn í bíó árið 2009

Aðsókn í kvikmyndahús hérlendis hefur aldrei verið jafn mikil og árið 2009. Þá voru seldir 1.690.310 miðar fyrir 1.418.162.965 kr. samkvæmt tölum frá SMÁÍS, samtökum myndrétthafa á Íslandi. Frá árinu 2008 jókst aðsóknin um 7% og heildartekjurnar jukust um 12%.

Það var á síðustu sýningu á síðasta degi ársins þar sem stórmyndin Avatar náði toppsætinu af The Hangover, sem hafði verið stærsta mynd ársins fram að því og er reyndar enn sú sem flestir fóru að sjá 2009. Munurinn í lok árs var aðeins 33.318 kr. Verður þetta að teljast góður árangur hjá Avatar sem var aðeins tíu daga í sýningu á árinu.

Þrjár íslenskar myndir ná inn á topp tuttugu listann og nær Jóhannes að vera stærsta íslenska myndin á árinu en næst kemur Bjarnfreðarson, sem er enn í sýningu, og svo Algjör Sveppi. Hlutdeild íslenskra mynda var rúmlega 10% sem er svipað og árið áður og sýnir að íslenskar myndir halda sinni hlutdeild á markaðinum.