Ricky Gervais hélt uppi fjörinu á Golden Globes hátíðinni í ár. Reuters

Samkvæmt áhorfstölum horfðu 16,9 milljónir Bandaríkjamanna á Golden Globe verðlaunahátíðina sl. sunnudagskvöld, og er það 14% aukning á milli ára.

Breski gamanleikarinn Ricky Gervais var aðalkynnir hátíðarinnar, sem var sýnd í beinni útsendingu um gjörvöll Bandaríkin. En það hefur ekki verið gert undanfarin ár, þar sem seinkun hefur verið á útsendingunni vegna tímamismunar í Bandaríkjunum.

Stærsta ár Golden Globe hátíðarinnar, þ.e. hvað varðar áhorf, var árið 2004, þegar 26,8 milljónir horfðu á útsendinguna. Það ár var þriðja myndin í Hringadróttinssögu valin besta myndin. Í ár var það Avatar.

Það var mikill munur á áhorfinu í ár og árið 2007 þegar handritshöfundar fóru í verkfall. Þá horfðu aðeins um sex milljónir Bandaríkjamanna á hátíðina, sem var lítið annað en blaðamannafundur.