Málverk eftir Pablo Picasso varð fyrir skemmdum á Metropolitan safninu í New York eftir að kona sem mætt var á myndlistarnámskeið missti jafnvægið, datt á myndina og reif hana.

Myndin, sem kallast Leikarinn, er 196x115 cm að stærð en um 15 cm bútur rifnaði upp í neðra horninu við óhappið á föstudag. Talsmenn Metropolitan safnsins hafa ekki gefið nánari útskýringar á því hvernig stóð á því að konan óheppna datt með þessum afdrifaríka hætti.

Í tilkynningu frá safninu segir hinsvegar að skemmdirnar hafi ekki varanleg áhrif á samsetningu verksins og að unnt verði að laga það á næstu vikum, áður en stór Picasso sýning verður opnuð á safninu þann 27. apríl með yfir 250 málverkum eftir meistarann.

Skemmdirnar ættu að vera „lítt áberandi" eftir viðgerð að sögn safnsins.

Picasso málaði Leikarann veturinn 1904-1905 á notaðan striga þar sem annað verk hafði þegar verið málað. Það var gefið Metropolitan safninu árið 1952