Yfir eitt þúsund verðandi brúðir tókust á í brjálæðislegri leit að brúðarkjólum á niðursettu verði í New York í gær. Brúðarkjólaútsalan er orðin árlegur viðburður í New York og dregur til sín verðandi brúðir alls staðar að frá Bandaríkjunum sem vonast til að fá kjóla á góðu verði.

Ein kona vaknaði klukkan þrjú um nótt til að keyra til New York frá Boston til að vera systur sinni innan handar við að finna sér brúðarkjól. Í boði voru rúmlega 2.400 kjólar frá mörgum tískuhönnuðum í öllum stærðum og var lægsta verðið í kringum 200 dollara. Samkeppnin var hinsvegar hörð og þurftu  sumar vonsviknar konur frá að hverfa án þess að finna hinn fullkomna brúðarkjól.