Facebook nýtur gríðarlegra vinsælda hjá netverjum, en þar eins og annars staðar á netinu, er nauðsynlegt að hafa varann á. Árni Sæberg

Partý sem unglingspiltur hélt í Bretlandi í fjarveru foreldra sinna fór algjörlega úr böndunum eftir að hann auglýsti það á Facebook með opinni síðu. Þegar foreldrar hans sneru aftur heim eftir helgarfrí var búið að leggja heimili þeirra í ríkramannahverfinu Kingston-upon-Thames í rúst.

Sonur þeirra, hinn 16 ára gamli Aneesh, gengur í einkaskólann Westminster og auglýsti meðal skólafélaga sinna á Facebook að hann væri einn heima og ætlaði að halda partý. Hann virðist hinsvegar ekki hafa leitt hugann að því hversu fiskisagan flýgur á internetinu þegar óvarlega er farið því um kvöldið mættu rúmlega 100 óboðnir gestir, lögðu húsið í rúst og skildu eftir sig slóð eyðileggingar.

Sex lögreglubílar og tveir sjúkrabílar voru kallaðir á staðinn til að ná stjórn á aðstæðum eftir að partýið fór úr böndunum. Nágrannar voru í áfalli og segja að þegar partýið stóð sem hæst hafi hömlulausir gestirnir m.a. migið út um glugga hússins.

„Það voru unglingar um alla götuna, öskrandi og gargandi og með ótrúleg læti," segir hin 47 ára gamla nágrannkona Sally Manton. „Þau voru ælandi og grýtandi hlutum út um gluggana, þar á meðal viftu. Þau migu út um gluggana og þú gast ekki séð í grasið í garðinum fyrir flöskum og dósum."

Fjölskyldan hefur neitað að tjá sig um málið í fjölmiðlum, en Facebook síða Aneesh er nú aðeins opin fyrir nánustu vini.