Amanda Seyfried leikur aðalhlutverkið í Dear John. Reuters

Ástarsagan Dear John, með Channing Tatum og Amanda Seyfried í aðalhlutverkum, ýtti óvænt vísindaskáldsögunni Avatar úr efsta sæti aðsóknarlista norður-amerískra kvikmyndahúsa um helgina.

Tekjur af Dear John námu 32,4 milljónum dala um helgina. Það voru einkum ungar konur, sem fóru á myndina sem er byggð á bókinni The Notebook eftir Nicholas Sparks. Svíinn Lasse Hallstrom leikstýrir sögunni. Að sögn Sony, sem framleiðir myndina voru 84% áhorfenda konur og 2/3 voru undir 21 árs aldri. Gagnrýnendur hafa verið lítt hrifnir af myndinni svo ekki sé meira sagt.

Tekjur af  Avatar námu 23,6 milljónum dala og nema nú alls 630,1 milljón í Norður-Ameríku. Er Avatar orðin tekjuhæsta mynd sögunnar í álfunni og sló met Titanic, sem sett var árið 1997. James Cameron leikstýrði báðum þessum myndum. 

Ný glæpamynd með John Travolta í aðalhlutverki, From Paris With Love, fór beint í 3. sætið á listanum en tekjur af sýningu hennar námu 8,1 milljón dala. 

Myndin Crazy Heart, sem sýnd hefur verið í takmörkuðum fjölda kvikmyndahúsa undanfarna tvo mánuði, fór nú upp í 8. sætið en Jeff Bridges, sem leikur aðalhlutverkið, var í síðustu viku tilnefndur til Óskarsverðlauna og þykir líklegur til að hreppa þau.