Teiknimyndin Skýjað með kjötbollum á köflum nýtur vinsælda hér á landi en slær Avatar þó seint við þegar kemur að tekjum. Courtesy of Sony Pictures Animation

Það er Avatar, enn og aftur, sem situr í efsta sæti yfir tekjuhæstu kvikmyndir helgarinnar og nema heildartekjur af henni, frá fyrstu sýningum, tæpum 130 milljónum króna.

Um 107 þúsund miðar hafa verið seldir á þessa miklu tæknibrellumynd og hafa sjálfsagt margir séð hana oftar en einu sinni.

Hin bráðskemmtilega Skýjað með kjötbollum á köflum, nýjasta teiknimynd Sony, fylgir fast á hæla Avatar enda vinsælt helgarsport hjá fjölskyldum að fara í bíó.

Hefndardramað Edge of Darkness, með þungbrýndum Mel Gibson í aðalhlutverki, er þriðja tekjuhæsta myndin. Rómantíska gamanmyndin It's Complicated er í fjórða sæti. 

Íslenskar myndir halda sér á lista, Bjarnfreðarson og Mamma Gógó, báðar margtilnefndar til Eddunnar í ár og hafa hlotið afbragðsdóma.