Dmitrí Medvedev í hópi hermanna í Krelm í gær. Reuters

Auglýsingaplaköt fyrir leiksýningu, sem á stóð: Við bíðum ykkar, kátu dvergar, voru tekin niður af veggjum í rússneskri borg skömmu áður en Dmitrí Medvedev, forseti Rússlands, kom þangað í heimsókn.

Rússneskir fjölmiðlar segja, að Medvedev sé 1,63 metrar á hæð.

Auglýsingarnar voru vegna barnaleikrits, sem verið er að sýna í borginni Omsk, en þær voru fjarlægðar af húsveggjum þar sem bílalest Medvedevs átti að fara framhjá þegar forsetinn heimsótti borgina 12. febrúar. Þetta er fullyrt á vefnum nr2.ru. 

Að sögn Reutersfréttastofunnar var mynd af barni í gervi dvergs á plakötunum.

Ýmislegt fleira var gert til að flikka upp á Omsk áður en Rússlandsforseti kom þangað í heimsókn, að sögn bloggara og blaðamanna. Meðal annars var hreinum snjó dreift yfir gamla skítuga snjóinn á þeim stöðum sem forsetinn heimsótti.