Lil Wayne leiddur í handjárnum út úr dómhúsinu. Reuters

Bandaríski rapparinn Lil Wayne var leiddur út úr réttarsal í New York í handjárnum eftir að hafa verið dæmdur í árs fangelsi fyrir brot á vopnalögum en hann var með byssu í fórum sínum.

Rapparinn, sem fékk fern Grammy-verðlaun á síðasta ári og hefur selt plötur í bílförnum, þarf að afplána dóminn í Rikers Island fangelsinu en fær að dvelja á varðhaldsganginum og þarf ekki að umgangast harðsvíraða glæpamenn. 

Lil Wayne, sem er 27 ára  og heitir réttu nafni Dwayne Michael Carter Jr., játaði í október að hafa verið með skammbyssu í fórum sínum án leyfis. Byssan fannst í rútu, em hann notaði á tónleikaferð. 

Til stóð að dómur yrði kveðinn upp í síðustu viku en réttarhaldinu var frestað vegna þess að eldur kom upp í dómhúsinu. Rapparinn notaði tækifærið og sletti úr klaufunum og lét einnig gera aðgerð á demantskreyttum tönnum sínum.