Valgarð Briem, stofnandi minningarsjóðsins, Hulda Jónsdóttir, styrkþegi og Hanna Birna Kristjánsdóttir, borgarstjóri.

Hanna Birna Kristjánsdóttir borgarstjóri afhenti Huldu Jónsdóttur, fiðluleikara, styrk úr minningarsjóði Gunnars Thoroddsen fyrrverandi borgarstjóra og forsætisráðherra í Höfða í dag. 

Sjóðurinn var stofnaður af hjónunum Bentu og Valgarði Briem 29. desember 1985 þegar liðin voru 75 ár frá fæðingu Gunnars. Þetta er í tuttugasta og fjórða sinn sem veitt er úr sjóðnum og hafa styrkþegar bæði verið félagasamtök og einstaklingar sem hafa starfað að mannúðar-, heilbrigðis- og menningarmálum, samkvæmt fréttatilkynningu.
 
Hulda Jónsdóttir er á 19 aldursári og stundar nám við Juilliard-tónlistarskólann í New York og  hlýtur styrk úr sjóðnum til frekara framhaldsnáms í fiðluleik við tónlistarskólann.
 
Hulda hefur komið fram á tónleikum með virtum tónlistarmönnum bæði hérlendis og erlendis og hlotið fjölda viðurkenninga m.a. verðlaun í einleikarakeppni á vegum Sinfóníuhljómsveitar Íslands og Listaháskólans árið 2008.