Tom Jones hefur selt milljónir platna, en vann áður fyrir sér við verksmiðjustörf. Reuters

Minnisblöð sem starfsmenn vinnumiðlunar í Wales skrifaðu fyrir um hálfir öld sýna að þeir töldu ekki miklar líkur á að Tom Jones næði miklum frama á tónlistarsviðinu. Starfmennirnir lögðu skv. minnisblöðunum til að Jones yrði fundið starf sem óhreinkaði ekki neglur hans, og gefa í skyn að hann hafi ekki mikinn áhuga á því að vinna heiðarlega vinnu.

Jones, sem fyrir löngu er orðinn heimsþekktur söngvari og hefur selt milljónir platna, vann verksmiðjustörf í byrjun sjöunda áratugarins, á sama tíma og hann reyndi fyrir sér sem söngvari með hljómsveit sinni.

Starfsmenn vinnumiðlunarinnar töldu hins vegar augljóslega að tónlistarást Jones kæmi í veg fyrir að hann fyndi sér alvöru starf. „Svo virðist sem áhugamál hr. Woodward [eins og Jones hét þá] gefi nokkuð vel af sér sem letur hann frá því að finna sér öruggt starf. Skoðið og leggið til eins fljótt og auðið er eitthvað sem mun ekki óhreinka neglur hans!" skrifuðu þeir í desember 1963.

Minnisblöðin verða boðin upp af uppboðshaldaranum Mullock's í Englandi eftir rúman mánuð. Búist er við að þau verði slegin fyrir þúsundir punda.