Pink Floyd árið 1967 utan við byggingu EMI í Lundúnum: Roger Waters, Nick Mason, Syd Barrett og Richard Wright. AP

Réttarhöld hófust í  London í dag vegna kæru rokkhljómsveitarinnar goðsagnakenndu Pink Floyd á hendur plötufyrirtækinu EMI. Málið snýst um greiðslur fyrir sölu á tónverkum rokkaranna á netinu.

Pink Floyd skrifaði undir útgáfusamning við EMI árið 1967 og í kjölfarið voru gefnar út plötur eins og Dark Side of the Moon, sem er ein af söluhæstu plötum allra tíma. Lögmaður hljómsveitarinnar, Robert Howe, sagði fyrir rétti í dag að deilan snerist m.a. um það hvort EMI hefði rétt á því að selja stök lög á netinu án þess að það sé gert hinu upprunalega samhengi platnanna.

Pink Floyd liðar segja þetta stríða gegn samningi þeirra við útgáfufyrirtækið en talsmenn EMI halda því fram að ákvæðið í samningnum eigi ekki við um sölu á netinu. Líklegt er talið að máli muni teygjast á langinn.

Hjómsveitin Pink Floyd öðlaðist heimsfrægð með framsækinni rokktónlist á sjöunda og áttunda áratugnum. Vinsældir hennar náðu hámarki við útgáfu Darkd Side of the Moon árið 1973 en í kjölfarið fylgdu hinar víðfrægu Wish You Were Here, Animals og loks The Wall árið 1979.

Pink Floyd kom saman að nýju á Live 8 tónleikunum í Hyde Park í London árið 2005. Richard Wright, hljómborðsleikari, lést árið 2008.

Meðlimir Pink Floyd, þeir Dave Gilmour, Roger Waters, Nick Mason og Rick Wright á Live 8 tónleikunum 2. júlí 2005. STEPHEN HIRD