„Þetta var ótrúlega sterk upplifun. Með svona mikinn andlegan stuðning og stuðning vina og ættingja á Íslandi getur stelpan ekki haft betra bakland. Það ræðst síðan af samningum hennar og almættisins hvernig fer,“ segir Haraldur Ægir Guðmundsson, tónlistarmaður og húsamálari í Salzburg í Austurríki. Hann lýsir því þegar hann og kona hans, Harpa Þorvaldsdóttir söngkona, gengu inn á sviðið með Matthildi dóttur sína í lok styrktartónleika sem haldnir voru í Salzburg í fyrrakvöld.

Hátíðarsalur Mozarteum tónlistarháskólans var fullur og gestir stóðu og sátu við hliðargang og í anddyri og fylgdust með á skjá. Íslendingar í Salzburg stóðu fyrir tónleikunum og fram komu þekktir listamenn.

Matthildur fæddist í byrjun desember. Fljótlega kom í ljós að hún þjáðist af afar flóknum og sjaldgæfum æða- og hjartagalla og þurfti að gangast undir miklar læknisaðgerðir á sjúkrahúsi í München í Þýskalandi. Eftir sjö vikna dvöl á gjörgæsludeild kom Matthildur heim til Salzburg og Haraldur segir að hún hafi það gott.