Þýskur karlmaður sem reyndi að kúga fé út úr fyrirsætunni Cindy Crawford og eiginmanni hennar var í dag dæmdur í tveggja ára fangelsi. Hótaði hann að selja fjölmiðlum mynd af sjö ára gamalli dóttur þeirra þar sem hún er bundin og kefluð. Myndina tók fyrrverandi barnfóstra þeirra hjóna í löggu- og bófaleik, að sögn dótturinnar Kaiu.

Maðurinn, Edis Kayalar, 26 ára, krafði Crawford um 100 þúsund dali, 12,8 milljónir króna. Kayalarer er vinur barnfóstrunnar og  stal ljósmyndinni af henni. Hann taldi sig geta fengið hálfa milljón dala fyrir myndina hjá slúðurblöðum og hótaði því að selja myndina slíku blaði ef Crawford og eiginmaður hennar, Rande Gerber, myndu ekki greiða honum féð.

Þau greiddu honum 1 þúsund dali í júlí í fyrra og fengu myndina afhenta. Tveimur dögum síðar hafði hann aftur samband og heimtaði meiri peninga fyrir afrit af myndinni.  Í kjölfarið höfðu þau samband við lögreglu og í nóvember gaf Kayalar sig fram við lögreglu í Þýskalandi.