Jeff Bridges ásamt eiginkonunni, Susan Geston á Óskarsverðlaunahátíðinni. Reuters

Óskarsverðlaunahafinn Jeff Bridges segir að það myndi aldrei hvarfla að honum að eiga í ástarsambandi með leikkonu sem er kannski eins gott fyrir hann þar sem hann er kvæntur.

Bridges, sem er sextugur að aldri, hefur verið kvæntur Susan Geston í 33 ár en þau kynntust á búgarði þar sem Bridges var við tökur en hún starfaði sem þjónustustúlka á búgarðinum.

Bridges segir að hann muni aldrei láta freistast og halda framhjá konu sinni. „Þú vilt ekki eiga í kynferðislegu sambandi við annan leikara. Það þýðir bara vandræði. Fjölskylda mín var og er of dýrmæt í mínum huga. Ég veit að kynlíf getur kostað þig allt," segir Bridges.

Hann segir að ástríðan hafi ekki kulnað á þessum áratugum og ef eitthvað er þá fari sambandið bara batnandi. „Ég er svo ástfanginn af henni. Sambandið verður bara betra, nánara, meira æsandi og allt það. Kona mín styður mig og það gerir það að verkum að ég elska hana enn meira."

Hann viðurkennir hins vegar að hafa verið heldur villtari á sínum yngri árum.