Hvalkjöt. Eggert Jóhannesson

Veitingamaður í Santa Monica í Kalíforníu á yfir höfði sér ákæru fyrir að bjóða upp á sushi úr hvalkjöti en hvalkjöt er á bannlista í Bandaríkjunum. 

Veitingahúsið Hump og Kiyoshiro Yamamoto, matreiðslumaður, eru sökuð um að hafa selt sandreyðarkjöt. Á Yamamoto yfir höfði sér allt að árs fangelsi og allt að 100 þúsund dala sekt og veitingahúsið gæti þurft að greiða 200 þúsund dala sekt. 

Í yfirlýsingu frá skrifstofu saksóknaraembættisins í Santa Monica segir, að sandreyður sé skráð sem dýrategund í útrýmingarhættu og því sé sala á kjötinu alfarið bönnuð í Bandaríkjunum. 

Saksóknarar segja, að húsleit í The Hump í síðustu viku hafi leitt í ljós  að veitingahúsið hafi selt hvalkjöt í að minnsta kosti þrjú skipti. Ekkert var reynt að fela hvers eðlis kjötið var, það var skráð á reikninga sem viðskiptavinir fengu og DNA rannsóknir á kjötinu staðfestu einnig að um var að ræða sandreyðarkjöt.

Blaðið New York Times segir, að stjórnvöld í Kalíforníu hafi fengið ábendingu um málið fráa kvikmyndagerðarmönnum, sem gerðu myndina Cove um höfrungadráp í Japan en myndin fékk Óskarsverðlaun um helgina sem besta heimildarmyndin.   

Blaðið sagði að Louie Psihoyos, leikstjóri The Cove, hefði reynt að afla upplýsinga um hvalkjötssölu The Hump. Hefðu starfsmenn hans farið þangað með leynilegar myndavélar og tekið sýni af hvala-suhshi, sem þeir pöntuðu.

Hvalkjötsskammturinn fyrir tvo kostaði 60 dali á The Hump, jafnvirði 7700 króna.

Sandreyður var veidd hér við land framundir lok níunda áratugar síðustu aldar.