Breski leikstjórinn Guy Ritchie mun að öllum líkindum taka að sér að leikstýra kvikmynd um Artúr konung. Síðasta mynd Ritchie, Sherlock Holmes, gekk vel í miðasölu og nú er komið að því að poppa upp kónginn sögufræga, líkt og Ritchie gerði með Holmes. Kvikmyndavefurinn Variety segir frá þessu og að handritshöfundur myndarinnar verði sá sami og skrifaði handritið að Trainspotting, John Hodge. Verður það að hluta til byggt á fornum sögum frá 15. öld af sigrum Artúrs og koma riddarar hringborðsins að sjálfsögðu við sögu sem og hið helga gral.

Áhugamönnum um Artúr konung er sjálfsagt í fersku minni kvikmyndin King Arthur frá árinu 2004, en í henni fór Clive Owen með aðalhlutverkið.