Mugison kynnir nú land og þjóð fyrir Bandaríkjamönnum. hag / Haraldur Guðjónsson

Vestfirski tónlistarmaðurinn Mugison er staddur í Norður-Ameríku þar sem hann mun gefa íbúum Boston og Toronto forsmekk af Íslandi á kynningu sem ber nafnið Taste of Iceland. Frá þessu er greint á vef Bæjarins besta á Ísafirði.

Hátíðin Taste of Iceland er liður í samkomulaginu Iceland Naturally, sem íslensk stjórnvöld og nokkur íslensk fyrirtæki gerðu fyrst með sér í tengslum við landafundahátíðina vestanhafs árið 2000. Kynningin felur einnig í sér kynningu íslenskra eðalkokka á íslenskum matvælum á fjölda veitingastaða, sérstakt ferðamálaátök, kvikmyndahátíðir, og kynningar á íslenskri vöru og þjónustu. Kynning hófst í Boston á fimmtudag og stendur til 17. mars en þá færir hún sig til Toronto þar sem Ísland verður kynnt frá 17. mars til 20. mars nk.

Bæjarins besta vitnar til heimasíðu Mugison en þar kemur fram að tónlistarmaðurinn er farinn að huga að nýrri plötu þar sem hann mun nota hljóðfærið sem hann og Páll Einarsson hönnuðu. Mugison hefur einnig betrumbætt vef sinn en þar er komið nýtt pöntunarkerfi sem auðveldar fólki að versla tónlist hans, segir á bb.is