Fyrir þá sem vantar hugmynd til að gleðja uppáhaldsbangsann sinn er ekki úr vegi að líta til Tékklands. Þar hefur hugvitssamur frumkvöðull nú stofnað ferðaskrifstofu sem býður upp á tveggja vikna skemmtiferðir fyrir bangsa til höfuðborgarinnar Prag. Eigendur senda bangsana til borgarinnar þar sem dekrað er við þá með skoðunarferðum og nuddi svo eitthvað sé nefnt.

Herlegheitin kosta um 300 evrur, eða rétt um fimmtíuþúsund kall. Bangsi er svo sendur heim alsæll með myndir og gjafir handa eigandanum.

Hugmynd frumkvöðulsins féll í það góðan jarðveg hjá tékkneskum fjárfestum að tveir þeirra stærstu settu 24.000 evrur, um fjórar milljónir króna í  bangsaferðaskrifstofuna.