Jude Law. AP

Breska leikaranum Jude Law virtist bregða þegar hann var í sjónvarpsviðtali spurður út í sex mánaða dóttur sína Sophie sem hann átti eftir  stutt samband með bandaríska samkvæmisljóninu Samönthu Burke.

Spyrillinn fór kannski ekki mjög fínt í hlutina þegar hann sagði: „Þú barnaðir konu í desember árið 2008 samkvæmt The National Enquirer.“

Jude er sagður hafa brosað augsýnilega taugaóstyrkur og svarað: „Allt í lagi , allt í lagi. Þetta er gott hjá þér. Það er ekki gott að fara að ræða mál sem slúðurpressan veltir sér upp í svona viðtali. Kannski ég ætti bara að fara.“

Þó Jude, sem á einnig þrjú börn með fyrrum konu sinni Sadie Frost, hafi virst tregur til að ræða nýjasta barn sitt þá hefur þegar verið greint frá því að hann hafi komist að samkomulagi við móður þess. Felur það meðal annars í sér að hann heimsæki Sophie tvisvar ári og borgi móður hennar 5.000 pund á mánuði eða tæpa milljón gegn því að hún ræði ekki um sig við fjölmiðla.