Lísa í Undralandi, eða Undirlandi eins og það heitir víst í myndinni, heldur toppsætinu aðra helgina í röð en hasarmyndin Green Zone kemur í kjölfarið með garpinn Matt Damon innanborðs. 17 milljónir króna hafa fengist með miðasölu á Lísu og ætti það að þykja harla gott.

The Good Heart, nýjasta kvikmynd Dags Kára Péturssonar, er í áttunda sæti og nema tekjur af henni frá fyrstu sýningum um 1,7 milljónum króna.

Það kemur fátt á óvart á Bíólistanum, Loftkastalinn sem hrundi heldur þriðja sætinu og mun sjálfsagt halda jafnri og góðri aðsókn næstu helgar.

Avatar er í sjötta sæti en sá smellur hefur rakað krónunum inn í peningakassa bíóhúsanna, tæp 141 milljón króna, takk fyrir. Þó hefur kvikmyndin verið sýnd í 13 vikur.

Óskarsverðlaunamyndin The Blind Side var frumsýnd fyrir helgi en hún er í fjórða sæti. Afbragðsræman Precious er í 9. sæti, dettur niður um fjögur.