Hljómsveitin Hydrophobic Starfish var valin besta hljómsveit kvöldsins af dómnefnd á öðru úrslitakvöldi Músíktilrauna sem fram fór í Íslensku óperunni í kvöld. Áhorfendur völdu hinsvegar hljómsveitina Snjólugt og munu bæði böndin því spila á úrslitakvöldinu í næstu viku.

Fyrirkomulag Músíktilrauna er þannig að fjögur úrslitakvöld eru haldin og eftir hvert þeirra komast 2 hljómsveitir áfram, önnur sem valin er af dómnefnd en hin af áhorfendum í sal. 11 bönd spiluðu í kvöld og var nokkuð þétt setið í Íslensku óperunni. Þess má geta að yngsti keppandi kvöldsins var aðeins 12 ára gamall, hann heitir Arnar Geir Gíslason og spilaði á bassa með hljómsveitinni Dólgarnir frá Vestmannaeyjum.

Rokkbræðingssveitin Hydrophobic Starfish er skipuð einvalaliði úr Reykjavík og Keflavík, þeim Marínu Ósk Þórólfsdóttir söngkonu, Arnari Pétri Stefánssyni á gítar, Magnúsi Benedikt Sigurðssyni hljómborðsleikara, Ingvari Agli Vignissyni á bassa og Höskuldi Eiríkssyni trommuleikara. Þau eru á aldrinum 20 til 23 ára.

Hljómsveitin Snjólugt er af Álftanesi og úr Mosfellsbæ skipuð fjórum 19 ára síðpoppurum, þeim Finn Sigurjóni Sveinbjarnasyni píanóleikara og söngvara, Bjarna Degi Karlssyni trommuleikara, Baldvin Ingvari Tryggvasyni gítarleikara og Gísla Má Guðjónssyni bassaleikara.