Charlie Sheen og Brooke Mueller

Bandaríski leikarinn Charlie Sheen neitar að hafa ráðist á eiginkonu sína, Brooke Mueller, á jóladag líkt og hún hefur haldið fram. Að hennar sögn sneri hann hana niður og hélt hnífi að hálsi hennar. Ástæða árásarinnar er talin vera hótun Mueller um að skilja við eiginmanninn.

Verjandi Sheen, Stan Rosenfield, sagði fyrir dómi í Aspen að leikarinn fagni því að geta hreinsað nafn sitt við réttarhöldin. Sheen var ekki sjálfur viðstaddur í réttarsalnum í gær en næsta vitnaleiðsla í málinu er í apríl.

Bæði Sheen og Mueller hafa verið í meðferð að undanförnu, hann við áfengis- og kókaínfíkn og hún vegna sömu fíkna. Saman eiga þau eins árs gamla tvíbura sem voru með þeim í skíðafríi í Aspen um jólin þegar Sheen á að hafa ráðist á Mueller. Tvíburarnir hafa verið í umsjón fóstru á meðan foreldrarnir eru að vinna í sínum vandamálum.