Eftir 30 ára vinnu og 9.000 breytingar á texta Finnegans Wake, síðustu skáldsögu James Joyce, hafa fræðimennirnir Danis Rose og John O'Hanlon sleppt höndum af verkinu fyrir útgáfu. Þegar bókin kom út árið 1939 vissu gagnrýnendur, hvað þá almennir lesendur varla hvað þeir áttu að segja, svo erfiður, flókinn og illskiljanlegur er texti verksins.

Í The Guardian er haft eftir Joyce að hann hafi skrifað bókina til að halda gagnrýnendum uppteknum næstu 300 árin, og að eina krafan sem hann gerði til lesenda sinna væri að þeir ættu að helga líf sitt lestri bóka hans.

Rose og O'Hanlon hafa unnið að textagreiningu sinni í þrjá áratugi og segja að lesendur fái nú í hendur auðlæsilegri og skiljanlegri útgáfu sögunnar. Þau hafa rýnt í þúsundir blaðsíðna af uppköstum, hugmyndum og athugasemdum sem Joyce skildi eftir sig, að auki 20.000 síður í handriti og 60 minnisbækur. „Til að ná í textann urðum við að fylgja slóð Joyce aftur á bak og það er erfiðara að fara aftur á bak en áfram,“ er haft eftir Rose.

Hann segir að með þessari nýju útgáfu sé „tími Finnegans Wake kominn. Við erum loksins að verða samtímamenn Joyce. Það hefur tekið þessi 90 ár síðan Ulysses kom út að geta byrjað að lesa Finnegans Wake. Nú getur Ulysses stigið til hliðar. Sú bók tilheyrði 20. öldinni, Finnegans Wake tilheyrir þeirri 21.“