Leikararnir Johnny Depp og Angelina Jolie eru við tökur í Feneyjum en þau leika saman í kvikmyndinni The Tourist, eða Ferðamaðurinn, sem þýsk austurríski leiksstjórinn Florian Henckel Von Donnersmarck leikstýrir. Hann gerði meðal annars kvikmyndina Das Leben der Anderen sem vann til fjölda verðlauna á árunum 2006 og 2007.

Sást til Depp og Jolie fyrir framan Danieli Hotel, eitt flottasta hótel Feneyja en það er rétt við Markúsartorgið. Jolie er þó ekki ein á ferð með Depp því Brad Pitt og börnin eru einnig með í för ef marka má myndir sem ljósmyndarar hafa náð af parinu í Feneyjum.

The Tourist er spennumynd þar sem saga bandarísks ferðamanns er sögð en Depp fer með það hlutverk. Hann kemst í hættu þegar liðsmaður Interpol, sem  Angelina Jolie leikur, notar ferðamanninn sem gildru í eltingaleik við glæpamann. 

Byggir myndin á franskri kvikmynd frá árinu 2004, Anthony Zimmer, þar sem Sophie Marceau og Yvan Attal fóru með aðalhlutverkið.