Héraðsdómur í Aberdeen í Skotlandi sektaði mann nokkurn um 600 pund, jafnvirði 115 þúsund króna, fyrir að ráðast á lögreglukonu og beita kynfærum sínum sem vopni.

Breska ríkisútvarpið BBC segir að maðurinn, sem heitir Marium Varinauskas og er 28 ára, hafi reynt að slá lögreglukonuna í höfuðið með getnaðarlim sínum þegar hún var kölluð í íbúð hans.

Varinauskas viðurkenndi brot sitt en sagði fyrir réttinum, að hann hefði verið ofurölvi og myndi ekkert eftir atvikinu. Það var unnusta mannsins sem kallaði á lögreglu í nóvember vegna þess að Varinauskas var með drykkjulæti á heimili þeirra.

Fram kemur á vef BBC, að þegar lögreglan kom í íbúðina sat Varinauskas á sófanum í nærbuxunum einum. „Sakborningurinn reis á fætur og stóð yfir lögregluþjóninum með liminn afhjúpaðan og otaði honum að andliti hennar þannig að hún neyddist til að víkja sér undan," segir í lögregluskýrslunni.  

Fullyrt er að Varinauskas hafi dregið mjög úr áfengisneyslu sinni eftir þetta atvik.