Roman Abramóvítsj. Getty images

Rússneski kaupsýslumaðurinn Roman Abramóvítsj hefur gert samkomulag við ítalska blaðið La Repubblica sem felur í sér, að blaðið greiðir honum umtalsverðar miskabætur og tekur aftur fullyrðingar um að auðkýfingurinn hafi tapað heilli snekkju í póker.

Blaðið birti frétt þessa efnis í maí í fyrra undir fyrirsögninni: Svart ár hjá Abramóvítsj sem tapaði snekkju í póker. 

Sarah Toolan, lögmaður Gruppo Editoriale L'Espresso, útgáfufélags blaðsins, sagði að fyrirtækið bæði Abramóvítsj innilega afsökunar á þeim óþægindum og hugarangri, sem greinin hefði valdið. Féllist blaðið á, að ásakanirnar væru ósannar og hefðu aldrei átt að birtast á prenti.

Í greininni sagði m.a. að snekkjan, sem Abramóvítsj átti að hafa tapað, væri hálfs milljarðs evra virði. Þá hefði spilafíkn kaupsýslumannsins valdið erfiðleikum í sambandi hans og Döshu Zhukóvu, sambýliskonu hans. Þá væri Abramóvítsj nú að spila póker á netinu.

Lögmaður Abramóvítsj sagði að skjólstæðingur sinn myndi gefa miskabæturnar til góðgerðarmála. Hann er 4. ríkasti Rússinn og 50. ríkasti maður heims en eignir hans nema 11,2 milljörðum dala að sögn tímaritsins Forbes.